Rubrikën e tij “Sy m’Sy”, kryeministri Edi Rama e nisi me përshtypjet më të mira të Komisioneres për Zgjerimin Marta Kos për vendin tonë. Rrjedhimisht, tha kreu i qeverisë, BE do të japë 64.5 milion euro për Shqipërinë. “Sinjal” që tregon sipas tij, një anëtarësim akoma më të afërt në Bashkimin Evropian.
“Komisionerja për Zgjerimin Marta Kos përgëzon Shqipërinë dhe RMV-në për shpejtësinë në marrjen e financimit nga plani i ri i rritjes, që do të thotë përmbushje e detyrave sipas kalendarit dhe programit të dakordësuar. Bëhet fjalë për 64.5 milion euro që vijnë drejtpërdrejt për Shqipërinë, 30 milion euro për buxhetin e shtetit si mbështetje për reformat e axhendës kombëtare të reformave dhe 34 kalojnë përmes Fondit të Investimeve të Ballkanit Perëndimor për infrastrukturën.”
Më tej, u shpreh se shumica dërrmuese e vendeve anëtare në BE, e konsiderojnë këtë të fundit qendër paqeje dhe sigurie.
“Për herë të parë, që nga 1983-in, ka një shifër rekord. 74% e bllokut të BE që beson se vendi i tyre ka përfituar nga BE dhe që sot ka arsye të tjera për ta mbështetur. 35% e mbështetësve të kësaj mase shumë domethënëse, citojnë paqen dhe sigurinë. Kjo është arsyeja pse po ua përsëris çdo ditë se më 11 Maj, vota ka një peshë gjeopolitike ekzaktësisht për të garantuar paqen dhe sigurinë. 34% citojnë rritjen e bashkëpunimit mes vendeve, që ndikon direkt te ekonomia. Popujt e Europës kanë ndjerë thellë kërcënimin që vjen nga ndarja e BE-së dhe ndërkohë janë të një mendje masivisht, që qendra e BE-së është qendra e sigurisë”, deklaroi Rama.
