Kryeministri Edi Rama iu ka treguar burgun deputetëve të opozitës. Nga një takim në Lushnjë, për “Bashkinë që duam”, kryeministri tha se ata kanë frikë nga drejtësia dhe duan të fshihen mes popullit.
“Ne nuk tërhiqemi nga detyrimi që kemi marrë në bazë të kontratës së zgjedhjeve për ta çuar deri në fund reformën në drejtësi. Aty fle lepuri më i madh i frikës së atyre që protestojnë. Dje ishin në parlament, sot thotë jemi popull. I gënjen mendja, se do fshihen mes popullit kur duhet të japin llogari. Njerëzit prisnin me të drejtë se disa prej tyre nuk duhet të ishin rrugëve, por aty ku e ka vendin. Por këtë nuk e bën qeveria, ne kemi bërë atë që duhet por atë që pak kush e mendonte më parë. Bëmë një reformë që ishim gati të prishnim dhe qeverinë, sepse ata nuk e donin drejtësinë. Ne nuk mundemi gjë tjetër veçse t’ju themi: Udhë të mbarë! Edhe pse është rrugë e gabuar”, tha Rama.
Kryeministri nuk la pa përmendur dhe vendimin e deputetit Myslim Murrizi për të mos djegur mandatin.
“I vetmi me dy pare mend në kokë na doli Myslim Murrizi. Thoni ctë doni, por unë doja ta kisha thënë unë atë shprehjen: u nisën për të rrëzuar Edi Ramën, por më rrëzuan mua. Kjo që është sot jemi ne, ajo që ishte dje janë ata. E për ta bërë më mirë, kush mund ta bëjë. Vetëm ne, ata kanë vetëm të shkuarën. Ne dhe ju jemi e vetja fuqi e bashkuar që mund të sjellë të ardhmen”. /G.F Opinion.al
