Kryeministri Rama ka zhvilluar një komunikim me moderatorin Hans Ulrich Obrist, Drejtori i Galerisë “Serpentine” në Londër.
Në një bashkëbisedim mbi politikën, Shqiperinë dhe Europën, Rama tha se nuk mund të heqim dorë nga Europa, pasi duam të ndërtojmë një vend europian. Ndërsa lidhur me zgjedhjet e 30 qershorit dhe krizën e thellë politike në Shqipëri, Rama u shpreh se politikanët shqiptarë nuk bien kurrë dakord, madje as për kohën.
“Europa është së pari projekt Paqeje dhe për të mirën e gjeneratave të tjera, prandaj s’mund të heqim dorë. Europa nuk po shkon mirë, po ne prap e duam. Nuk të futemi që t’i shtojmë kokëçarjen e drejtuesve të Europës, por duam të ndërtojmë një vend Europian. Ne kemi një jetë shumë të vështirë politike. Cilësia e demokracisë nuk varet nga sa biem dakord. Ne nuk biem dakord as për orën. Duhet të piqemi, sepse demokracia nuk është e thjeshtë. Rritja, maturimi, janë pjesë e këtij tranzicioni të dhimbshëm. BE është e rëndësishme dhe integrimi është unik, sepse na jep mjetet për t’u modernizuar, për të ndërtuar institucionet, një sistem drejtësie të besueshëm, mbi shqiptarët duhet të bësh reforma që nuk janë shumë popullore, por ka nevojë për mbështetje e madhe. Për ne rrugëtimi ka më shumë rëndësi se mbërritja. Mund të fitojmë aftësitë që ka Evropa”, ka deklaruar ndër të tjera Rama./Opinion.al
