Shteti e ka fituar betejën me krimin. Kështu mendon kryeministri Edi Rama, ndërsa sipas tij faj kanë mediat që japin çdo lloj lajmi.
“Kazani arrin në pikën e vlimit kur shfaqet Babalja, Nicja i Shijakut dhe shoku i tyre i pandashëm Ervin Salianji. Gjithë ata që e kanë marrë dhe e marrin për budalla këtë popull kanë marrë dhe do marrin të gjithë atë që meritojnë. Kjo vjen për shkak të mungesës së tyre të ideve, vizionit”, tha Rama.
Shefi i qeverisë dha shifra që të bënin të mendosh se Shqipëria është si Norvegjia, apo ndonjë vend tjetër. Ndërsa vetëm pak ditë më parë një avokat i njohur u ekzekutua në qendër të Elbasanit.
“Më vjen shumë mirë që ne përsëri sot nuk jemi në vendnumëro nuk mjaftohemi me sa kemi arritur por konfirmojmë se asaj çka kemi arritur është një shtysë për të shkuar më tutje. Vetëm në 2 muajt e parë të këtij vitit janë referuar 60 raste për pastrim parash dhe janë sekuestruar 8.2 milionë euro. Ajo që është mbledhur nga krimi i organizuar është shumëfish i vlerës së sekuestruar në 8 vitet e qeverisjes së atyre. Ne nuk mund ta harrojmë që kur ne u zgjodhëm kryefjala e të gjithë shqetësimeve ka qenë kriminaliteti. Kjo nuk është më e vërtetë, pasi kur ne zhvilluam fushatën për mandatin e dytë jo vetëm që kriminaliteti nuk ishte kryefjala e shqetësimeve por policia ishte institucioni më i besuar publik”, tha Rama.
Por për kryeministrin ka kadrinj, siç i cilëson ai gazetarët në vend, por ka edhe eurokadrinj. Këta të fundit janë gazetarët nga mediat e huaja.
“E hodhën bojën e zezë për ta filmuar dhe për ta eksportuar. Nuk mund të eksportojnë dot në botë një tufë punonjësish të bashkive bashkë me Dashon e Lazaratit, që mblidhen këtu për të kënduar himnin, pasi kanë dalë xhiro. Boja është një produkt që do thithet menjëherë nga tregu ndërkombëtar i medias. Për fat të keq nuk janë pak eurokadrinjtë, por ata janë të pafajshëm sepse pak ose aspak dinë nga Shqipëria. Por duan të ushqejnë opinionin e tyre”, theksoi më tej Rama. /Opinion.al
