Në një aktivitet të zhvilluar në qytetin e Shkodrës, Rama tha se Kadastra nuk do të ekzistojë më si sportel dhe të gjitha shërbimet që sot kryhen aty, do të kalojnë online.
Sipas kreut të qeverisë në këtë mënyrë “do të hiqen” sekserët ndërsa sipas tij titulli i pronësisë do ju shkojë qytetarëve në telefon.
“Kadastra do mbyllet si sportel për të aplikuar që të heqim dhe sekserët. Po bëjmë, i kemi dhënë shtysë të re, procesit të digjitalizimit të plotë të kadastrës që brenda këtij mandati titulli i pronësisë të të vijë në telefon. Është e mundur të mos shkohet fare në kadastër për të aplikuar, sportelet e kadastrës do mbyllen. I bëjmë këto takime për t’i thënë shqiptarëve që keni një Shqipëri të re. Qytetarët për të marrë një shërbim kanë qenë të detyruar që të shkojnë në zyra të tjera për të marrë dosjen, shkojnë kërkohen shumë letra, për të marrë një dokument duhet të bësh 10 radhë, kjo nuk do ekzistojë më, ti do bësh vetëm aplikimin, dhe të gjitha letrat që ti deri më sot i merr ti nëpër zyra do i siguroi vetë zyra ku t’i aplikon. Nuk do kesh më nevojë të çosh dëshmi penaliteti” .
Ndër të tjera, gjatë fjalës së tij, Rama nënvizoi qëndrimin e tij të shprehur edhe më herët se dixhitalizimi është një pike e madhe kthese në luftën kundër korrupsionit në administratë.
“Të gjithë ata që rrinë nëpër sportele duke parë nga xhepat, nuk do shohin më njeri dhe aty te ekrani i kompjuterit do punojnë për çdo njeri”, u shpreh ai./Opinion.al
