Kryeministri Edi Rama dhe ministri i Brendshëm, Fatmir Xhafaj, ditën e sotme, në një takim me drejtues të Policisë së Shtetit, mbajtur në Ministrinë e Brendshme, kanë paralajmëruar vetting në radhët e policisë.
Gjatë fjalës së tij, kryeministri Rama tha se përveç mbërritjes së agjentëve të specializuar të FBI-së dhe atyre gjermanë, shumë shpejt pritet të vijnë edhe agjentë nga vendet partnere, ndërsa po diskutohet edhe me një kompani hetuesish me ish-agjentë të FBI-së.
Sipas tij, këta agjentë do sjellin në vendin tonë jo vetëm eksperiencën e tyre, por do sjellin edhe instrumentet e tyre operacionale për vettingun në Policinë e Shtetit.
Për të, nuk do ketë drejtues policie që nuk do kalojë testin.
Rama: Do të vijë një agjent prestigjioz i FBI. Mbërrin dhe një agjent tjetër për të mbështetur policinë kundër krimit të organizuar. Po diskutojmë me një kompani hetimesh që drejtohet nga ish-agjentë të FBI-së dhe do të vijnë këtu. Do sjellin eksperiencë që ne nuk e kemi, fuqi motivuese, por do sjellin dhe instrumentet e tyre operacionale për vetingun në Policinë e Shtetit. Nuk do ketë drejtues policie që nuk do të kalojë testin. Ka dhe një instrument për sinqeritetin, poligrafi. Të gjitha këto do të jenë këtu.
