Kryeministri Edi Rama, njoftoi se nga java e ardhshme do të zgjatet orari i daljes për pazar, ndërsa në 4 maj do të lehtësohet shumë lëvizja me makinë brenda qyteteve.
Me anë të një video-mesazhi në Facebook, Rama u shpreh se do të hapet edhe blloku i tretë i bizneseve që do të ndihmojë ekonominë familjare.
“Hapja e domosdoshme duhet të jetë graduale. Vigjilenca duhet të jetë maksimale, imponimi dhe vetëimponimi i rregullave duhet të vazhdojë. E di që iu kanë lodhur mërzitur lejet, autorizimet, ndryshimet por duhet të kuptoni që kjo është një dhimbje koke për ju dhe për mua që kam përgjegjësi t’ju mbroj. Javën e ardhshme do e rrisim orarin për Pazar dhe do hapim dhe rrugët ndërqytetëse për taksitë. Dhe nga e hëna 4 maj do ta lehtësojmë shumë lëvizjen brenda qyteteve, qoftë me këmbë, qoftë me makinë madje pa e kufizuar tek makinat që duan të shkojnë në punë dhe po ashtu do hapim dhe bllokun e tretë të bizneseve”, deklaroi Rama./Opinion.al
