Kryeministri Edi Rama së bashku me ministren e Infrastrukturës dhe Energjisë, Belinda Balluku dhe biznesmenin Behgjet Pacollin ka inspektuar nga afër kantierin e Aeroportit Ndërkombëtar të Vlorës.
Gjatë fjalës së saj ministrja Balluku tha se ecuria e punimeve për ndërtimin e aeroportit është e kënaqshme, ndërsa theksoi se pista e Aeroportit të Vlorës do të jetë pista më e gjatë në Republikën e Shqipërisë.
“Ecuria është e kënaqshme. Do të kujtojmë që kjo do të jetë pista më e gjatë në Republikën e Shqipërisë, pra 3.2 km, duke përmbushur kështu një kusht për kategorinë 4 E të këtij aeroporti. Aeroporti vetëm në territorin tonë i 4 E akomodon dhe fluturime transoqeanike” – shpjegoi Ministrja e Infrastrukturës dhe Energjisë Belinda Balluku.
Ndërsa në lidhje me vendet e punës që mund të sjellë ndërtimi i këtij aeroporti, kryeministri ka pyetur biznesmenin Behgjet Pacolli, kompania e të cilit do të ndërtojë aeroportin e Vlorës.
Pacolli është shprehur se në këto momente nuk ka shumë punëtorë pasi puna në këtë fazë kryesisht duhet të kryhet me anë të makinerive, por kur do të jetë fluksi më i madh i punimeve, numri i punëtorëve aty do të jetë 600 deri në 700 persona.
Edi Rama: Sa punëtorë do të kemi këtu në ditë?
Behgjet Pacolli: Mendojmë të shtojmë parkun e makinerisë…Tani nuk ka shumë punëtorë.
Belinda Balluku: Në të ardhmen, deklaruat që do të ishte një shifër 600 apo jo kur të jetë koha e të gjitha punimeve?
Behgjet Pacolli: Po, 600-700 në kohën kur do të ketë shumë punime.
Edi Rama: Po, pra atë pyeta unë.
Belinda Balluku: Në këto momente janë makineritë që dominojnë duke qenë se ka pasur gërmime.
