Kryeministri Edi Rama shkoi për të inspektuar punimet në konviktet e Inxhinierisë së Ndërtimit, ku 1080 studentë do të përfitojnë sipas tij kushte optimale jetese.
Ky është projekti i Bankës Gjermane që sipas Ramës do të zhvillohet edhe në godina të tjera.
Rama: Janë kushte dhe standarde njësoj si në Gjermani për shkak të programit të Bankës Gjermane për Zhvillim. Kjo do të jetë pararoja e standardeve dhe e gjithë transformimit. Ndërkohë që për godinat e tjera do veprojmë më shpejt dhe me standarde dinjitoze dhe evropiane.
Menjëherë pas kryeministrit në konviktet e inxhinierisë shkoi kryetarja e LSI, Monika Kryemadhi, e cila tha se ky konvikt duhet të kishte përfunduar në dhjetor të këtij viti, po ende vijojnë punimet.
Kryemadhi: Ky është një projekt i 2011, i cili duhet të kishte mbaruar në 20 dhjetor 2018 dhe akoma nuk ka mbaruar. Nuk mjafton kjo, por vjen dhe bën show mediatik për të treguar që po mbaron sa më shpejt.
Më herët Kryemadhi, në një takim me strukturat e LSI në Elbasan akuzoi Ramën se po vjedh bashkë me oligarkët e tij para nga projektet dhe u shpreh se ka ardhur koha që shqiptarët ta rrëzojnë këtë regjim.
