Kryeministri, Edi Rama, së bashku me zvendës/kryeministren dhe njëherazi ministren e infrastrukturës dhe Energjisë, Belinda Balluku, ka inspektuar sot punimet në aksin Elbasan-Qafë Thanë, pjesë e Korridorit VIII.
Rama bën me dije se në këtë aks po punohet sipas grafikut të përcaktuar, i cili është në fazën e përgatitjes për hedhjen e shtresave asfaltike.
Deri tani, thotë kreu i qeverisë, janë në përfundim shtresat mbushëse të trupit të rrugës ku në total ka përfunduar 42% e punimeve.
“Në kantierin e aksit Elbasan-Qafë Thanë, pjesë e Korridorit VIII, që falë Samitit të BE në Tiranë hyri më në fund në korridoret europiane pas vitesh të tëra “luftë” dhe së bashku me aksin Durrës – Prishtinë – Nish do t’i japë përfundimisht Portit të Ri Tregtar të Durrësit rolin e shumëdëshiruar strategjik, si nyje lidhëse Lindje – Perëndim për lëvizjen e mallrave.
Po punohet sipas grafikut të përcaktuar për këtë lot të rëndësishëm, i cili është në fazën e përgatitjes për hedhjen e shtresave asfaltike.
Deri tani janë realizuar 95% e veprave të artit si ura, tombino, bokse. Ka përfunduar mbrojtja lumore dhe janë në përfundim shtresat mbushëse të trupit të rrugës ku në total ka përfunduar 42% e punimeve”-shkruan Rama.
