Kryeministri Edi Rama bashkë me ministren e Shëndetësisë Ogerta Manastirlliu inpektuan këtë të diel punimet për ndërtimin e depos së re farmaceutike në QSUT. Investimi 18 milionë eurosh është financuar nga qeveria dhe synon kushte optimale për ruajtjen e barnave.
Po kështu, u premtua një shërbim i ri falas për pacientët e Okulistikës. Bëhet fjalë për vendosjen e lentes ose e kataraktit, e cila deri dje i kushtonte çdo pacienti 700 dollarë.
“QSUT prej këtij viti fillon ofrimin e një shërbimi shumë të rëndësishëm, falas për çdo qytetar që ka nevojë për ndërhyrjen e kataraktit, ose vendosjen e lentes. Do të ofrohet për më shumë se 2000 pacientë në vit, gjithashtu dhe në spitalet rajonale. Spitali Rajonal i Vlorës e ka filluar, gjithashtu pritet të fillojë dhe spitali i Elbasanit”, – u shpreh ministrja Manastirliu.
Kryeministri Rama vlerësoi e mbështeti punën e mjekeve në sistemin spitalor të vendit. “Këtu dhe në spitalet në tërësi ka mjekë fantastikë dhe infermierë shumë të devotshëm, kuptohet, ka edhe nga ata që na turpërojnë, por e vërteta është që unë e kam parë me shumë njerëz që kalojnë nga spitali, që ndryshojnë mendim kur bëjnë shërbimin, se presin keq dhe ju del mirë”, u shpreh Kryeministri. /Opinion.al
