Kryeministri Edi Rama, të enjten, zhvilloi një takim në Ministrinë e Arsimit me rektorët e dekanët e universiteteve publike në lidhje me 8 kërkesat e propozuara nga studentët për t’u plotësuar.
Kryeministri Rama tha se çështja e studentëve me aftësi të kufizuar ka prekur shumë njerëzit, ku në një moment është revoltuar dhe ka goditur tavolinën.
Ai deklaroi se janë një mijë e ca punonjës që paguhen kot, pasi dalin studentët e verbër dhe s’kanë gjënë më minimale.
Sipas tij, u desh protesta që të dëgjonte problemet e tyre.
“Nuk dua t’a zgjasë më shumë, por dua të them që për mua 8 pikat e ngritura janë vetëm parathënia e një libri, që është shumë i ngatërruar dhe patjetër që duhet korrigjuar i gjithi”,- tha Rama.
Më tej, kryeministri theksoi se nuk diskutohet që gjithçka dhe gjithkush nga ana e qeverisë që ka lidhje me arsimin, ka përgjegjësi.
Duke shtuar më poshtë, se nuk mund të jetë ai që do t’u thotë se sa përgjegjësi kanë ata, por këtë duhet t’a tregojnë.
“Protesta do mbaroj një ditë, studentët do të kthehen në gjendje normale, sa të jem unë kryeministër, do më keni protestues. Nëse mundësitë janë të kufizuara të gjithë i kuptojnë, por kur t’i loz me të tjerët të gjithë nuk të kuptojnë’,- tha Rama
