Duke folur për mundësinë e uljes në tavolinën e dialogut me opozitën, kryeministri Rama ironizoi ndër të tjera kryetarin e LZHK, Dashamir Shehi.
“Çfarë të bëj unë tashi, të marr një shishe raki e të shkoj te Dashi e ti them hajde Dasho ti fusim dy teke, t’bohemi mirë e të shkojmë te Luli…” tha Rama në një intervistë në News 24 mbrëmjen e së enjtes.
Në lidhje me këto deklarata ka reaguar sot kreu i LZHK-së. Për Shehin këto deklarata nuk kanë rëndësi pasi për sa i takon cështjeve personale ai thotë se nuk përballet për to me kryeministrin por për teza politike.
“Nuk me shqetëson shumë kjo. Unë do vazhdoj të bëj atë që kam bërë gjithë jetën. Unë me kryeministrin do përballohem gjithmonë me teza politike. Ky më është përgjigj mua me gotat e rakisë, unë nuk jam marrë kurrë seç eshët jeta e tij personale, ç’bën ky, ç’përdor ky. Ku ta di unë, ca thonë drogë ca thonë… Nuk më hynë në punë fare.
Se kur martohet se kur ndahet, se çfarë bën me të dashurat e veta në qeveri është punë për të, është personale. Se si vishet ky me atlete me brekushe është prapë personale. E gabuar është, nuk është e moralshme, por prapë personale është. Unë me ketë do vazhdoj të merrem sa herë që ky të atakojë interesat e Shqipërisë”, ka thënë Dash Shehi në një intervistë për ABC News.
Ai shtoi gjithashtu se pasioni për pijen është i vetmi “zullum” me të cilin ka arritur ta sulmojë mazhoranca dhe për të cilin ai thotë se është një zakon në traditën shqiptare e cila nuk e ka penguar në ushtrimin e funksionit publik.
“Bëj çfarë të kesh qejf me jetën tënde personale. Jam shumë i lumtur që në jetën time personale, në historinë time, zullumi më i madh që më kanë zbuluar është që pijë raki apo verë. Punë e madhe fort, kjo është një e drejtë zakonore shqiptarët e kanë pirë gjithë jetën. As që më shqetëson fare, as më ka parë njeri as të pirë dhe as budalla. Atë e kanë parë nën efektet e atyre” deklaroi Shehi. /Opinion.al
