Kryetari i Bashkisë Dibër, Muharrem Rama, ka reaguar ditën e sotme në lidhje me akuzat e bëra në adresë të tij nga deputetja e qarkut të Dibrës, Reme Lala nga foltorja e Kuvendit.
Në fjalën e saj në Kuvend, Lala theksoi se kryebashkiaku i Dibrës nuk po i shërben komunitetit, por është vënë vetëm në shërbim të bizneseve të veta.
“Bashkia Diber eshte inekzistente, Dibra eshte e paralizuar. Nje ose dy dite ne jave shkon kryetari i bashkise ne bashki nga 20 minuta, dhe athere pasi te kete pire nja 5 dopio raki. Dhe ato pak shkresa qe firmosen qe jane ne interesat e kryetarit e rrethit te ngushte shoqeror te tij, jane te njollosura me yndyre qoftesh dhe te lagura nga rakia, sepse firmosen neper qepabtore. Ky kryetar bashkie nuk vleresohet nga askush me ne DIber, se eshte ne sherbim vetem te bizneseve te veta”, – tha Lala në parlament.
Nga ana tjetër, sot, Muharrem Rama, në një koment të gjatë ndër të tjera thotë se Lala u bë deputete me vota personale, duke përdorur intriga dhe presione pasi në Dibër nuk ka komunitet çam.
“Të këshilloj mos të flasësh në emër të së ashtëquajturës Parti tënde por ti referohesh gjithmonë votave personale ashtu si edhe vetë i quajte. Dhe e di pse, sepse në Dibër as nuk ka elektorat Çam dhe aq më pak votues që të njohin kauzat e shenjta do t’thoja të kësaj partie. Mjaft i është marrë vota Dibranit me mashtrime e gënjeshtra, intriga e presione, me buk e kërbaç, mos i ngatërro edhe më këtë pjesë se nuk e meritojnë kaq shumë t’jua fyesh Inteligjencën” – thotë Rama në komentin e tij duke e mbyllur me një frazë për babain e deputetes së re: “Pastaj të jesh e sigurtë që me të kaluarën dhe të tashmen e larmishme që ka babai yt do dalësh e humbur dhe e dëmtuar. Dëm ky”.
Vlen të theksohet se Rama i fitoi zgjedhjet lokale në Dibër bashkë me votat e PDIU-së që ndodhej në atë kohë në koalicion me PS-në.
