Kryeministri Edi Rama i është përgjigjur akuzave të kreut të opozitës Lulzim Basha, në lidhje me avokatin e marrë për gjyqin ndaj gazetarit gjerman të gazetës Bild.
“Artist, ti nuk zhgënjen kurrë, je njish! Je i pandehur për qindra mijëra euro ruse a dreqi e di ç’janë, të cilat po dreqi e di sa versione do sajosh deri në gjyq për t’i justifikuar dhe del e bilbilon për krimin që do paguaka avokatin gjerman për të luftuar lirinë e medias në Gjermani”, shkruan Rama.
“Se kuptove kurrë o njish që është shah politika, jo kukamçefthi as topa luftash,po mos u mërzit! Gjyqi do bëhet në Gjermani,faturat do publikohen në Shqipëri dhe e vërteta për tërë atë çorbë të prishur që gatuat,për ta helmuar këtë vend e miqtë e tij, do dalë e plotë. Gjermanisht”, thekson kryeministri Rama në një tjetër postim në Twitter.
Në një konferencë për mediat, zoti Basha tha se avokati që ka pajtuar Rama faturon të paktën 13 euro për minutë. Sipas Bashës, Rama faturën do ta paguajë me paratë e mara nga droga dhe aferat e tjera korruptive. / Opinion.al
