Kryeministri Edi Rama, i cili është një takim me pensionistët, ka folur për protestat kundër rritjes së çmimeve që po zhvillohen prej një jave në vendin tonë.
Ai ka “sulmuar” edhe një herë protestën, të cilën e konsideron si një protestë politike. Rama u shpreh se e di kush qëndron pas kësaj proteste dhe kush i paguan naftën e këtyre autobusëve që sjellin protestues nga të gjitha anët e Shqipërisë.
Ndër të tjera ai u shpreh se kjo protestë mund t’i pëlqejë Rusisë.
“Keqardhje për ata që i sjellin nga gjithë anët e Shqipërisë, të paguar nga kush? Kush i paguan naftën atyre autobusëve, i paguajnë ata të shkretët që vijnë me dy gishta kështu. Ne i dimë kush janë, janë për keqardhje, por turp edhe ata që mbështesin këtë protestë. Është një protestë që e shëmton Shqipërinë, që e turpëron shqiptarin. Ka pasur një shok të rritjes së çmimeve që kur ka filluar lufta, por çfarë do bëjmë ne sikur kjo histori të vazhdojë me muaj dhe vite. Do dalim të hamë njëri – tjetrin në rrugë? Si mund të jemi ne i vetmi vend që dilet dhe protestohet për pasojat e luftës mbi çmimet, ku në asnjë vend tjetër ku efektet janë njësoj dhe të gjithë janë të shqetësuar të dalin njerëzit për të protestuar kundër luftës, këtu bëhet një protestë që mund t’i pëlqeje Rusisë. Kjo është një nga pjesët e strategjisë të asaj lufte. Që njerëzit që mbështesin Ukrainën të dalin në protesta ekonomike dhe më pas të harrojnë se çfarë luhet atje. Atje nuk luhet fati i Ukrainës, por i Evropës”,-tha Rama.
