Kryeministri Edi Rama i është lëshuar sot Ben Blushit me lloj lloj fjalësh. “Ben, të gjithë e dinë se doje të bëheshe pak ministër. Të gjithë e dinë se gjithë revolta jote është se nuk u bëre pak ministër. Ti që qëllon me baltën e Sailut, pasi u lodhe duke shkatërruar partinë”, tha ndër të tjera Kryeministri.
Pjesë nga fjala e Ramës
Dëgjova këtë shkrimtar të ri dhe politikan të vjetër që duket sikur ka zbritur këtu mes nesh shqiptarëve të shkretë për tu dhënë pushtetin të varfërve. Miku im Beni të kam dëgjuar duke recituar hartimet e tua me mllëf . Ti erdhe në këtë parlament me votat e socialistëve të Elbasanit dhe keqpërdore mandatin për të baltosur qeverinë njësoj si Sali Berisha.
O Blush, mendoj se nuk meriton minuta e fjalë por kjo përgjigje është se ti edhe pak ditë do e lësh karrigen që ke zënë dhe po e përdor për hesapet e tua. Të jap këtë përgjigje edhe në emër të shokëve të tu ministra që u kishe rezervuar bataret e radhës.
Të gjithë e dinë se Beni vdes për pak ministër sa është gati të shfaqet i rilindur në lëkurën e politikanit të ri.
O Shpëtimtar i pavlerësuar i Shqipërisë si mund të ishe ti ministër? Ti dole në Elbasan me rezultatin më të dobët. Pse duhet të ishe ministër para Tahirit, Beqajt apo Klosit?
Ti që ishe miku i Saimir Tahirit, që privatisht i qaje hallin se nuk u bëre ministër, nga ana tjetër në parlament i ngulje thikat e Sailut.
Por s’ke faj se ti je një mendjemadh i pashërueshëm.
Por s’ka problem, parlamenti ka vend edhe për gënjeshtarë, edhe për ministra sa për të zënë vendin si puna e tij.
S’të mbeti gjë tjetër veçse të ikësh dhe të fillosh nga jashtë me parti, pasi nuk pate sukses për ta rrëzuar nga brenda këtë qeveri.
Ilir Beqja të jep ujë në bisht të lugës kur vjen puna për program.
Reformator i pazbuluar i Shqipërisë.
Miku im i pandreqshëm e di që me ty kalohet bukur darkave me nje got verë, por me ty nuk shkohet asgjëkund në mëngjes.
Dhe në fund një këshillë miqësore kur del në foto me të varfrit hiqi syzet. Ato nuk ta maskojnë dot hipokrizinë.
