Kryeminsitri Edi Rama ka mbajtur sot një takim me banorët Thumanës, ku dhe prezantoi projektet e banesave të reja për familjet të cilat u prekën nga tërmeti tragjik i 26 nëntorit. Gjatë bashkëbisedimit, me banorët e Thumanës, Rama i ka hequr mikrofonin një banoreje, në momentin që kjo e fundit përmendi Presidentin Ilir Meta.
Banorja i tha kryeministrit që të heq “përrallat” dhe t’i tregonte nëse do të merrte banesat e fëmijëve, që do të prishen për t’u bërë projektet e reja të rindërtimit. Por, teksa banorja kujtoi manifestimin e organizuar mbrëmjen e djeshme nga Meta, Rama ka kërkuar që t’i merret mikrofoni, duke thënë se po sjell ters në Thumanë.
Banorja: Aman o Edi Rama hiqi përrallat se s’po na mban vendi. Nga ky hall që na ka rënë, jemi bërë pesimistë, duke folur me vete, se kur kemi parë fëmijët aty dhe kërkonte ndihmë e nuk ishim të zotët ta ndihmonim. I kemi blerë shtëpitë me djersë. Dua të di çfarë do bëhet me shtëpitë, që kisha për djemtë, që janë në Itali. Këta thonë që do t’i prishin.
Rama: Më myte, më shkatërrove. Më lërë të flas. Ti sikur të sulmon, sikur të lavdëron, të myt.
Banorja: Të dyja bashkë i bëj.
Rama: Tani shtëpitë janë në emër të djemve?
Banorja: Janë në emrin e burrit dhe timin.
Rama: Shtëpitë do t’i marrësh, siç i kishe, të dy hyrjet në pallatet që kishe.
Banorja: Edhe një gjë tjetër, se dëgjova atë Ilir Metën atje
Rama: Boll tani, bjere mikrofonin, mos na sill ters në Thumanë, o Zot, kot s’e kemi çuar në Parlament këtë. Ishim mirë këtu, lëre tani mos na sill ters, lërja Presidencës./ Opinion.al
