Kryeministri Rama i është përgjigjur edhe deputetes Mimoza Hafizi, e cila tha një ditë më parë se Rama i kishte ofruar poste ministrore që të mos largohej nga partia.
Rama i është përgjigjur Eni Vasilit për pyetjen mbi Hafizin shkurt.
“Po Blushi të paktën i ka bërë nja 3 romane dhe ia vlen të flasësh, ndërsa Hafizi le të hajë përshesh te partia e Blushit”, ka thënë Rama.
PYETJE-PERGJIGJE
Mohoni gjithashtu që i keni ofruar poste ministrore zonjës Hafizi?
Kujt?
Zonjës Mimoza Hafizit. Për Ben Blushin edhe mund të shpenzonim pak kohë se i ka bërë nja tre romane. Por Mimozën le ta lëmë të hajë përsheshin në partinë e Blushit dhe të mos merremi me këtë temë, ju lutem.
Nuk është etike për një grua, një shprehje e tillë, qoftë edhe nga kryeministri…
Është një shprehje e njohur kjo dhe nuk ka lidhje fare dhe mos ma vini gjithmonë këtë përpara është etike për një grua, është etike për një burrë sepse unë nuk i ndaj njerëzit në burrë e në gra.
Unë i konsideroj të gjithë të barabartë kur është fjala për të diskutuar për politikën dhe mes njerëzish që janë të përfshirë në politikë.
Disa duke bërë punë, disa duke ngrënë përshesh por kjo është një çështje që nuk i ndan njerëzit në burra dhe në gra. Përsheshi është përshesh edhe kur e hanë burrat edhe kur e hanë gratë.
