Kryeministri Edi Rama ka mbajtur fjalën e tij në ceremoninë e dhjetë vjetorit të anëtarësimit të Shqipërisë në NATO. Rama ka dhënë disa mesazhe, që nga përmirësimi i kushteve për ushtarakët, baza e Kuçovës, anëtarësimi i Kosovës apo rreziqet e sigurisë globale.
“Shqipëria përgatitet të nisë veprën e rëndësishme të ndërtimit të bazës së NATO-s në Kuçovë, një ndër bazat më moderne të NATO-s në këtë rajon. Kjo është një simbolikë e bukur e këtij jubileu, sepse baza e konceptuar si një nga pikat e referimit të aleancave tona strategjike do të shndërrohet nga një bazë e lindur për t’u mbrojtur nga NATO, në një bazë të rilindur të NATO-s. Më në fund Ballkani, falë NATO-s gëzon një periudhë të qetë. Megjithatë të mos e harrojmë asnjëherë presidentin Kenedi, i cili thoshte se paqja nuk është një e mirë e përditshme, por një proces i pandërprerë, një përpjekje e përditshme”, tha Rama.
Ai përmendi disa nga arritjet që janë bërë në ushtri, që nga përmirësimi i kushteve dhe rritja e pagave për ushtarakët, megjithëse pranoi se kaq sa është bërë nuk mjafton. “Dua t’i them të gjithëve, që janë këtu apo në mendje këtu, si përfaqësues i forcave të armatosura, jam i vetëdijshëm që nuk mjafton. Viti që shkoi iu kushtua politikanit dhe ushtarakut të madh, Gjergj Kastriot Skënderbeut, duke na dhënë një shtysë jo vetëm për të fuqizuar forcat tona të armatosura në disa drejtime, por edhe për të transformuar dhe sjellë në standarde edhe orkestrën frymore të forcave të armatosura.”
Rama foli edhe për probleme të NATO-s me vende që nuk respektojnë ligjet ndërkombëtare, duke iu referuar Rusisë. “Aneksimi i Krimesë është vetëm një nga dëshmitë aktuale të kësaj dukurie”, tha ai.
Kryeminsitri gjithashtu tha hapur se Kosova me ushtrinë e saj duhet të bëhet pjesë e Aleancës së Atlantikut të Veriut. “Është e domosdoshme që edhe Kosova të bëhet më herët se vonë, pjesë e integruar e NATO-s. Integrimi i Kosovës në familjes euro-atlantike është një domosdoshmëri, jo vetëm për Kosovën dhe as vetëm për Ballkanin, por për gjithë familjen euro-atlantike. Përfshirja e Ballkanit në NATO është një vizion strategjik”, u shpreh ai./Opinion.al
