Menjëherë pas thirrjes që Drejtoresha e Komisionit Europian për Ballkanin Perëndimor, Genoveva Ruiz Calavera bëri për opozitën ka ardhur dhe reagimi nga Edi Rama.
Në një status të rrjetet sociale ai shkruan se është plotësisht dakord me delegacionin e BE.
“Koha që palët të dialogojnë! Reforma Zgjedhore, vota e emigrantëve, votimi/numërimi elektronik, penalitetet e reja për shitblerjen e votës, duhet të na bëjnë bashkë. Kush iku nga Kuvendi, ka ende vend në tryezën e reformës me status të barabartë!”, shkruan Rama.
Delegacioni i Bashkimit Europian në Shqipëri shpërndau foto nga takimi me përfaqësues të opozitës, duke shkruar se është koha që palët të ulen në dialog.
“Është koha që dy palët politike të bëhen bashkë për të mirën e vendit. Drejtoresha për Ballkanin Perëndimor në Komisionin Evropian, Calavera Ruiz u takua me përfaqësues të opozitës për t’u njohur me qëndrimet e tyre për situatën politike në Shqipëri përpara përgatitjes së raportit të vitit 2019”, shkruhet në postimin e përfaqësisë së Bashkimit Europian në Shqipëri.
Kuvendi shtyu deri në 5 maj afatin e komisionit ad hoc parlamentar të reformës zgjedhore. Në seancën e Kuvendit të mërkurën pati debate mes deputetëve të maxhorancës dhe demokrates Rudina Hajdari, lidhur me kërkesën e socialistëve drejtuar opozitës për t’u ulur për ndryshimet në Kodin Zgjedhor./Opinion.al
