Me vendim të qeverisë, Vangjel Tavo është prefekti ri i Qarkut të Vlorës. Vendimi është marrë ditën e sotme dhe vjen pas shkarkimit të Flamur Mamaj.
“Z. Flamur Mamaj, prefekt i Qarkut të Vlorës, lirohet nga kjo detyrë. Z. Vangjel Tavo emërohet prefekt i Qarkut të Vlorës. Ky vendim hyn në fuqi menjëherë dhe botohet në “Fletoren zyrtare”, thuhet në vendim.
Vangjel Tavo ka qene deputet nën siglën e LSI-së në qarkun e Gjirokastrës, e ndërsa socialistët i kanë besuar së fundmi një detyrë të re.
Ndërkohë, Ana Kapaj është emëruar zëvendësministre e Arsimit dhe Sportit.
Më herët Kapaj ka mbajtur postin e drejtueses së Komisionit të Jashtëm të Vlerësimit “Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme” (vetting-ut).
