Gjatë takimit për prezantimin e projektit të Teatrit të ri Kombëtar, kryeministri Edi Rama e ka thënë hapur se për të nuk do të ishte ndonjë problem nëse ky teatër do të kishte kullë, ashtu sikundër është aluduar gjerësisht prej disa kohësh.
“Nuk është një teatër me kullë, por nuk është asnjë mëkat edhe po të ishte një teatër nën kullë. Teatrot e Broduejt janë të gjithë nën kulla. Kur shkojnë njerëzit në teatër, nuk shohin kullat por shohin teatrin. Megjithatë, është një debat që ju mund ta vazhdoni me njëri-tjetrin. Besoj se është shumë e qartë se këtu nuk është historia se çfarë ka sipër apo anash, pavarësisht se sipër do të ketë një tjetër hapësirë teatrale në qiell të hapur dhe anash do të ketë hapësirat e veta për artistët. ”-tha Rama.
Në vijim të fjalës së tij kryeministri ka thumbuar edhe artistët që kishin protestuar para disa kohësh.
“Jemi në kushtet, ku kemi një teatër që do të jetë trefishi i këtij që është sot, dhe që do të ketë një sistem të tërë infrastrukture përreth, që sot nuk ekziston. Pa dyshim do të ketë dhe hapësirën e yjeve, të shuar e të pashuar të historisë së Teatrit Kombëtar. Kush ka kaluar në atë histori dhe ka lënë gjurmën e pashlyeshme të yllit të vet, do të jetojë aty në hapësirën e përgatitur enkas! Ashtu siklundër, kush del e bën protesta sot, do duhet të mendojë sesi të lërë yllin e tij aty, sepse nuk ka se çfarë bën më, sepse godina do të shembet për ti lënë vendin një godine të re.”-tha Rama.
