Kryeministrit Rama nuk i del inati me opozitën. Pasi të gjithë ministrat e tij folën për sukseset që kishin arritur në këto 6 muaj, fjalën e mori kryeministri Rama, i cili fillimisht u përpoq ti ulë me këmbë në tokë ministrat e tij, për tu marrë më pas në pjesën tjetër të fjalimit me opozitën. Në dukje një inat ky i Ramës, pas mossuksesit që pati në takimin me deputetët gjermanë, të cilët nuk i dhanë fjalën për hapjen e negociatave, çka për këtë Rama akuzon Opozitën si ndikuese me akuzat e saj.
Fjala e Ramës
“Duke dëgjuar ministrat, të krijohet ideja se cdo gjë është në rregull. Jo, në fakt nuk është në rregull. Në fakt ne u jemi përgjigjur gjatë këtyre muajve objektivave që kemi menduar. Por nga ana tjetër ne nuk jetojmë në një guackë të shkëputur nga realiteti. Njerëzit nuk hanë shifra. Nuk e mbushin tavolinën me shifra. Njerëzit nuk i veshin fëmijët me suksese, Në fund të muajit shikojnë ekonominë e tyre familjare. Kështu që duhet të jemi shumë më pranë njerëzve.
Por ne nuk kemi opozitë. Është një opozitë që nuk të sfidon në intelekt, por fizikisht. Është një hata e madhe që na ka rënë për pjesë. Një opozitë që shkon në parlament si në një tapet mundje. Jemi në kushtet kur jemi në një sport që nuk njihet nga asnjë federatë ndërkombëtare. Kjo opozitë është një opozitë e frikshme. Ata janë një forcë që nuk kanë asnjë respekt për shtetin”
