Kryeministri i Shqipërisë, Edi Rama, sonte, në Top Story ka deklaruar se do të shkojmë në zgjedhje edhe pa opozitën. Rama theksoi se ka parti opozitare që janë regjistruar për t’u bërë pjesë e garës në zgjedhjet e 18 qershorit, 2017.
Sipas tij, partitë e tjera që i janë bashkuar PD-së nuk kanë asnjë vlerë. Në lidhje me kandidaturën e Presidentit të Republikës, Rama tha se një President më afër PD-së si Meta nuk do të gjenim.
Ai e argumentoi se Meta është një president i lidhur me të gjithë dhe flet me të gjithë. “Meta është një zgjidhje ideale edhe për Partinë Demokratike”, tha Rama.
“Tani që Meta bëhet President do të vijnë ditë të bardha për PD-në dhe të zeza për mua”, tha Rama me ironi.
“Meta është Presidenti i duhur. Eshtë i lindur për atë punë, pasi ai është me të gjithë dhe me askënd. Do ta shihni sa mirë do të bëhet për PD-në Meta President”, tha Rama.
“Nesër Meta zgjidhet President i Republikës me konsensusin tonë dhe LSI-së”, tha Rama.
