Në seancën e sotme plenare në Kuvendin e Shqipërisë ish-kryeministri Sali Berisha ka folur për projektligjin që po shqyrtohet sot në parlament “Për ratifikimin e kontratës financiare ndërmjet Këshillit të Ministrave të Republikës së Shqipërisë dhe Bankës Evropiane të Investimeve, për programin “UKT Shpërndarja e Ujit”.
Berisha tha se dhe ky investim si të gjitha investimet e tjera do të grabitet. Teksa solli në vemendje nje episod të fushatës në Krujë ku Rama dhe Ekonomi inaguruan ujësjellësin dhe pinë ujë nga e njëjta shishe, Berisha tha se qyteti i Krujës sot është pa ujë.
Më tej ish-kryeministri theksoi se me rezervat ujore që ka Shqipëria mund të ketë ujë 24 orë, por sipas tij uji, rrugët, punët publike mbeten, ritenderohen sepse fondet vidhen.
“Diskutohet këtu për një vepër ujësjellësi, por natyrisht asnjë deputet nuk mund të përqendrohet vetëm te një marrëveshje për faktin e vetëm se kanë bindje të plotë se dhe ky investim do të përfundojë si investimet e tjera. Do të përfundojë i grabitur nga organizata kriminale që është në pushtet. Kujt i duket çudi do t’i rikujtoj një skenë gjatë fushatës zgjedhore. Edi Rama bashkë me zonjën Ekonomi u ngjitën në lartësitë e maleve të Krujës, inauguruan ujësjellësin, duartrokitën, madje pinë dhe me të njëjtën gotë ujin e burimit sikur të ishte kurativ, por sot Kruja nuk ka ujë. Sot qytetarët e Krujës nuk kanë ujë dhe nuk kanë ujë prej disa vitesh. Nuk kanë ujë as pas ndërtimit të ujësjellësit. Shqipëria është një vend i bekuar në këtë aspekt sepse me burimet e saj, ajo me një studim të bazuar, mund të çojë ujë në rubinet me rrjedhje të lirë në të 4 anët e vendit. Vetë relievi i saj bën të mundur që ultësira me potencialin e Vaut të Dejës dhe malit të Tomorit të ketë ujë 24 orë, por edhe të cilësisë shumë të mirë. Mirëpo uji, rrugët, punët publike mbeten, ripërsëriten, ritenderohen sepse fondet vidhen dhe nuk investohen. Sepse ndërtohet me çmime në punët publike të paktën 8 herë më të larta se sa ato të standardit europian. Në qoftë se një shkollë në standardin europian ndërtohet me 500 mijë euro, në standardin shqiptar ndërtohet me 3 mln euro. N.q.s në standardin europian 1 km rrugë ndërtohet me 2.1 mln euro në standardin shqiptar ndërtohet me 22 mln euro. për të mos thënë për zhdukje të investimeve publike dhe kur janë mbi 100 mln dollarë.Uroj që ky investim të mos mbetet i vdekur dhe të tjerët të mbushin xhepat me fondet e tij”, deklaroi Berisha.
