Kryeministri Rama ka komentuar me indiferentizëm dhe ironi kritikat e fundit të opozitës lidhur me ngërçin në drejtësi e veçanërisht në Gjykatën Kushtetuese, për shkak të procesit të vettingut. Përmes një postimi në FB, Rama shkruan:
“Po mbetemi pa gjykata të sipërme?Jo! Po operojmë organizma të kancerizuar që e degraduan deri në kockë drejtësinë. Më mirë djepi bosh se shejtani brenda! Ky pastrim është shpëtim për dekada e breza që vijnë,rilindja e këtyre gjykatave është vetëm çështje e më pak se një viti”.
I menjëhershëm ka qenë reagimi i kryedemokratit Basha, gjithashtu në FB. Basha i kthehet edhe një herë aferës së teatrit sikurse e cilëson, ndërsa shkruan:
“Djepi bosh i Gjykatës Kushtetuese i duhet kryeshejtanit për të mbrojtur mega aferën 200 milionë Euro me grabitjen e Teatrit Kombëtar.
Ndërsa shejtanët në djepin e Prokurorisë ju duhen për të mbrojtur lidhjet me krimin dhe aferat korruptive, nga Tahiri te Xhafaj, nga Dako te Veliaj, nga Gjiknuri te Ahmetaj, nga Sejdini te Roshi me shokë”.
