Sheshi Skënderbej është hapur mbrëmjen e djeshme për qytetarët në një koncert festiv të organizuar nga Bashkia e Tiranës. Në këtë aktivitet inaugurues për hapjen e sheshit Skënderbej Kryeministri Edi Rama tha se është hera e parë në historinë e tij politike që i dridhen gjunjët nga emocioni për sheshin, projekt që e kishte nisur në kohën kur drejtonte Bashkinë e Tiranës. “Është hera e parë në jetën time politike që unë nuk shkruaj dot një fjalim, besojeni ose jo por është hera e parë që mua më dridhen gjunjët, besojeni ose jo është nga fjalimet e rralla që do jetë i shkurtër. Kam kaluar në shesh përpara disa javësh me Lindën vetëm dhe nuk i mbaja dot lotët. Sepse e kam besuar që Shqipërisë, Tiranës i duhej ky shesh dhe ka pasur momente që jam dorëzuar duke menduar se ky shesh nuk do të bëhej kurrë.
Dhe kur ecnim atë natë me Lindën më dukej e pabesueshme por e mrekullueshme që megjithëse zgjati 10 vite sheshi i Skënderbeut rilindi dhe ambicia jonë për Tiranën fitoi. Nuk do të ishim këtu sot nëse nuk do të kishim lali Erin, të cilit i jam shumë mirënjohës që e rimori projektin dhe e çoi deri në fund. Padiskutim ky nuk do ishte një shesh kaq i bukur nëse nuk do shahej”, u shpreh Kryeministri Edi Rama.
Por kjo deklaratë e tij duket se nuk ka qenë dhe aq e pavërtetë, pasi vetëm pak para se të futej në sheshin “Skënderbej”, duket se Rama pësoi një incident që mediat “e fshehën”. Teksa po ecte, kryeministri ishte duke mbërthyer këmishën dhe për një moment pengohet, gati sa nuk bie në tokë. Zjarr Tv ka publikuar videon e plotë, të cilën mund ta shihni më poshtë. /Opinion.al
