Në emisionin Opinion të së enjtes, kryeministri Rama deklaroi se në ndryshimet e propozuara në kodin zgjedhor do të jetë edhe ai për dënim me burg për ata që gënjejnë në formularin e dekriminalizimit.
Ai u pyet në lidhje me përgjegjësitë e ministres së Drejtësisë Gjonaj për emërimin e drejtorit të burgut të Vlorës i cili u dënuar dje nga gjykata për shpërdorim detyre.
Në lidhje me këtë ngjarje kryeministri tha se nuk kishte mjaftueshëm informacion por nuk përjashtoi mundësinë që personi mund të kishte gënjyer. Ai shtoi gjithashtu se është e detyrueshme të deklarohet e vërteta në formularin e deklarimit por nuk është përgjegjësia e tij që kandidatët të gënjejnë. Ai përdoroi këtu si shembull kandidatin për Bashkinë e Shkodrës, Valdrin Pjetri, i cili u shkarkua pasi u denoncua nga Partia Demokratike se kishte qenë i dënuar në Itali.
Rama nuk përmendi as emrin e Pjetrit por tha se ai gënjeu dhe deklaroi ndryshimet që PS do të propozojë në lidhje me deklarimin e pastërtisë së figurës së kandidatëve për deputetë dhe kryetarë bashkie.
“Me detyrim e kishte edhe ai që e vumë ne kandidat në Bashkinë e Shkodrës që të bënte në deklarimin e vet deklarimin e të vërtetës, nuk e tha të vërtetën, gënjeu.
Përgjegjësia ime nuk është që të garantoj që në familjen tonë politike nuk ka asnjë gënjeshtar.
Për faktin se përgjegjësia në këtë sistem që kemi zgjedhur në raport me ligjin është individuale, por duke qenë që gënjeshtarë të tillë që shkojnë atje mbushin formularin e nevojshëm për pastërtinë e figurës dhe thonë nuk kam bërë gjë dhe pastaj dalin gënjeshtarë, i japin kosto morale një procesi të tërë, i japin kosto njerëzve atje që votojnë ne do bëjmë dy ndërhyrje:
E para, do ta vëmë taskative kush kapet në gënjeshtër në formular do shkojë në burg, me numër fiks jo që të shkojë në gjykatë dhe të shfaqet jo po ishte I shqetësuar jo po ashtu
E dyta do të fusim në ligj që të gjitha partitë të çojnë kandidaturat një muaj ose 45 para që të merret e të verifikohet nga strukturat që verifikojnë formularët” tha Rama. /Opinion.al
