Presidenti Meta ka pritur sot në mbrëmje në një takim një pjesë të Task-Forcës së ngritur nga qeveria dhe ministren e Shëndetësisë, Ogerta Manastirliu.
Presidenti njofton se takimin e ka thirrur ai për t’iu shprehur solidaritetin dhe përkrahjen e tij por dhe për të ngritur disa shqetësime me qëllim përmirësimin e mëtejshëm të reagimit institucional.
“Theksova domosdoshmërinë e rritjes së bashkëpunimit të ngushtë mes institucioneve, veçanërisht me qytetarët, si dhe përfshirjen e kapaciteteve njerëzore e shkencore, edhe jashtë shërbimit aktiv shëndetësor, duke e konsideruar këtë hap si vendimtar për suksesin e tejkalimit të kësaj sfide madhore”, shkruan Meta.
Reagimi i Metës vjen pas apelit të kryeministrit Rama për të mos patur disa task-forca por që institucionet të bashkëpunojnë dhe të përmirësohet niveli i komunikimit mes tyre. Ftesa e tij ishte drejtuar kreut të opozitës, Basha dhe Presidentit Meta.
Ky i fundit shkruan gjithashtu në postimin e tij në Facebook se ka përshëndetur mbështetjen financiare shtesë të miratuar nga qeveria për personelin shëndetësor.
Në fund Meta i bën thirrje qytetarëve të zbatojnë vetëm sugjerimet e institucioneve shtetërore, dhe për çdo shqetësim t’i drejtohen numrin 127 të vendosur në dispozicion nga Ministria e Shëndetësisë.
Në reagimin e Presidentit duket se ai i ka ulur tonet e ashpra ndaj qeverisë. Megjithëse ai nuk e përmend kryeministrin Rama, thirrja e përfaqësueses së qeverisë në takim mund të jetë një tregues se ai i është përgjigjur pozitivisht ftesës së kryeministrit. /Opinion.al
