Kryeministri Edi Rama ndodhet në Armeni aty ku po zhvillohet Samiti i Frankofonisë. Përmes një postimi në facebook, ai tregon se ka takuar Presidentin e Francës, Emmanuel Macron, edhe në shoqërinë e Presidentit të Kosovës Hashim Thaçi. Nuk ka asnjë detaj mbi bisedën e zhvilluar mes tyre.
Vetëm 15 minuta më pas ai shfaqet virtualisht në Shqipëri. Në profilin e kryeministrit në facebook, postohet nje aktivitet i Ramës duke inspektuar punimet në Rrugën e Arbrit, në zonën pas Dajtit.
Opinion.al u interesua pranë zyrës për mediat në Kryeministri e cila menaxhon edhe faqen në facebook, për të mësuar se ku ndodhet realisht kryeministri.
Ajo na informoi se Rama sot ndodhet në Armeni, ndërsa inspektimet në Rrugën e Arbrit janë zhvilluar gjatë ditës së djeshme edhe pse transmetohen sot në facebook. Sipas tyre, kjo është një praktikë e njohur e ERTV, duke sqaruar se vetem ato që mbajnë logon “Live” pasqyrojnë aktivitetet ne kohë reale të Kryeministrit.
