Në një ceremoni të zhvilluar sot ku u nënshkrua një memorandum bashkëpunimi mes Universitetit Bujqësor të Tiranës dhe Michigan State University, nuk kanë munguar batutat e kryeministrit Edi Rama.
Gjatë fjalës së tij kreu i qeverisë bëri një krahasim të shprehjes së rektorit të UBT me fjalën e Sekretarit të Partisë Komuniste, në kohën që Shqipëria ishte nën regjimin komunist, gjë që shkaktoi hilaritet dhe të qeshura në sallë.
“Kanadaja ka marrë pjesë të madhe. Edhe SHBA premtuan jo aq sa premtuan por një pjesë pasi e kanë pak si zakon që bëjnë më pak se sa premtojnë. Ne i marrim me kënaqësi.
Po qe puna për standarde dhe vlera i kemi këtu nuk ka ditë natë na japin me bujari të madhe. Kur vjen puna te gjërat konkrete japin por me kujdes. Se nuk kanë të shkretët.
Më pëlqeu shumë ajo pjesa që tha rektori ju garantojmë zonja ambasadore, mu kujtua koha kur vinte sekretari i partisë këtu nga Komiteti dhe i thoshte ai dekani i vjetër ju garantojmë shoku sekretar i Komitetit të Partisë se ne do punojmë që partia dhe populli të jene krenarë për ne. Edhe ne ju garantojmë patjetër. Këto kisha unë. Suksese. Rroftë miqësia Shqiptaro-Afgane”, tha Rama.
Yuri Kim: Jam e sigurt që përkthimi nuk ishte në rregull.
Edi Rama: Do pushohet përkthyesi tani.
