Kreu i qeverisë, Rama ka vizituar këtë të shtunë në Maminas, familjen Baruti. Kjo e fundit, është akomoduar në shtëpi me qira, pas tërmetit tragjik të 26 nëntorit.
Ndër të tjera, kryeministri iu premtoi familjarëve se për vitin e ri do të bëjnë “Gëzuar” në shtëpinë e re.
Ashtu si zakonisht gjatë vizitës nuk munguan as batutat. Kreu i qeverisë i kërkoi kryefamiljarit të mbajë mirë bashkëshorten, duke i thënë se po të mos ketë atë, ai do të ngjajë si një shtëpi pas tërmetit.
Pjesë nga biseda:
Rama: Mbaje mirë këtë.
Burri: Ajo duhet të më mbajë mua.
Rama: Ore kjo të mban ty, se po s’të mbajti kjo e di si je ti, si ajo shtëpia pas tërmetit. Po të mos jenë gratë në Shqipëri, burrat flasin me vete.
Duhet të falënderosh Zotin çdo ditë që e ke këtë.
Gruaja: Është i mirë, deri tani mirë kemi ecur.
Rama: E keni kolauduar marrëdhënien.
Gruaja: Kemi rritur shtatë fëmijë dhe shumë mirë.
Rama: T’iu rrojnë. Sa nipa e mbesa keni?
Gruaja: 15 nipa e mbeta, kemi dhe stërnip.
Rama: T’i keni me jetë se ajo është kryesorja. Shtëpitë bëhen prapë, me vështirësi, por bëhen. Angazhimi është se vitin e ri t’i mblidhni të gjithë te shtëpia e re dhe të bëni “Gëzuar”. Do fillojmë shpejt te këto shtëpitë individuale, që vitin e ri ta bëjnë aty gëzuar. Shtëpitë e reja do përballojnë shumë mirë erën, muret i kanë të izoluara, kështu që nëse ka “tërmet” në një dhomë, nuk dëgjohet te dhoma tjetër./Opinion.al
