Kryeministri Rama ka dalë në një deklaratë tjetër për t’ju përgjigjur sërish kreut të opozitës Lulzim Basha.
Më herët kreu demokrat iu përgjigj ftesës për bashkëpunim të Ramës duke i kërkuar llogari pse janë shpërndarë 1.2 milionë maska të skaduara dhe i ka bërë thirrje për të marrë masa reale kundër epidemisë.
Këmbënguljen e kreut të PD, Rama e cilësoi djallëzore por nga ana tjetër pranoi se maskave të denoncuara nga PD i kishte kaluar data e skadencës. Megjithatë Rama tregoi certifikatën e kompanisë Kanadeze që kishte sjellë masat duke shtuar se ajo nuk ndikon në parametrat e tyre të sigurisë.
Rama theksoi se këto maska nuk janë çuar në sallat e kirurgjisë por për përdorim të përgjithshëm në të gjithë sistemin.
“Morëm informacionin që përsëri Lulzim Basha ridel dhe bën thirrje dhe këmbëngul se janë shpërndarë maska mbrojtëse të rrezikshme. Madje, paska kërkuar edhe prokurorinë.
Kjo është certifikata të nderuar kolegë, konkurrentë apo kundërshtarë jeni gabim sepse edhe sikur të kishit konstatuar vërtetë një problem që nuk është fare problem siç tregon certifikata e autoriteteve kompetente në Kanada. Nuk mundet dot të vijnë me trajlera nga Kanadaja pajisje mjekësore që nuk mund të përdoren apo akoma më keq që janë të rrezikshme. Të gabosh është njerëzore por të këmbëngulësh është djallëzore.
Është djallëzore që pikërisht tani dhe kur të gjithë duhet të jemi bashkë, jo vetëm që nuk ndjeni përgjegjësinë më minimale ndaj atyre që përfaqësoni dhe ndaj atyre njerëzve që duhet të jepni një kontribut. Por, përkundrazi rrëmoni si minj për të nxjerrë të paqenat dhe u hidhni njerëzve në këtë momente helm.
Certifikata, përshkrimi antimikrobial për maskat e fytyrës dhe e bën shumë të qartë që ajo data e skadencës që rrëmoni ju nuk ka lidhje fare me përdorimin e tyre dhe jep të dhëna shumë specifike mbi mbishkrimin dhe efikasitetin e tyre. Ne nuk i çuam në sallat e kirurgjisë. Dhe megjithëse parametrat i kanë si përqindje të reduktimit të efektit 99 për qind, përsëri i kemi çuar për përdorim të përgjithshëm për të gjithë sistemin”, tha Rama.
Në fund të deklaratës së tij ai iu drejtua drejtpërdrejtë kreut të PD duke i thënë se kjo nuk është lojë.
“Boll dole atje duke vazhduar ti biesh fyellit në një vrimë, ku vetëm zvogëlohesh sepse kjo është luftë nuk është lojë”. /Opinion.al
