Ka ardhur dhe reagimi i kryeministrit Edi Rama pas marrëveshjes Kosovë-Serbi. Rama uron kryeministrin e Kosovës për arritjen e marrëveshjes për normalizimin e ekonomik me Serbinë.
Kryeministri shkruan në rrjetet sociale se i vjen keq që Kosova humbi kohë për t’u dakordësuar që të jetë pjesë e mini-Shengenin Rajonal, që sipas tij, ka interes kombëtar.
“Asnjë tradhti burra ! Urime Kryeministrit Hoti për marrëveshjen e arritur me Serbinë, e cila s’është fundi po vazhdimi i të vetmes rrugë drejt njohjes përfundimtare: Dialog për gjithçka, Bashkëpunim për çka mundet sot, Këmbëngulje për çka duhet nesër! Keqardhje që u humb kaq kohë për t’u dakordësuar me Shengenin Rajonal,si një projekt ambicioz me interes kombëtar zhvillimi përmes rritjes së bashkëpunimit, e si një shtysë më shumë për integrimin europian të shteteve tona, Po më mirë vonë se kurrë, edhe falë Amerikës mike. Njohja e Kosovës nga Izraeli është fruti fantastik i kësaj marrëveshjeje me potencial të madh zhvillimor, po edhe shembull për të gjithë që lufta për paqen përfundimtare me Serbinë nuk bëhet as me shpata virtuale kundër Beogradit, as me damkosje digjitale tradhtarësh imagjinarë”,-shkruan Rama.
Marrëveshja është përshëndetur dhe nga Presidenti Ilir Meta, i cili e ka cilësuar si një hap të rëndësishëm drejt normalizimit të marrëdhënive Kosovë-Serbi.
“E përshëndes nënshkrimin e marrëveshjes mes Kosovës dhe Serbisë, të negociuar nën udhëheqjen e Shteteve të Bashkuara të Amerikës dhe Presidentit Trump!Një hap i rëndësishëm drejt normalizimit të plotë të marrëdhënieve mes të dy vendeve, në funksion të paqes e stabilitetit në rajonin tonë,-shkruan Meta.
Ndërkohë, kreu i PD ka falenderuar Presidentin Trump dhe SHBA, Donald Trump për marrëveshjen e arritur mes Kosovës dhe Serbisë. Basha thotë se kjo marrëveshje do të përbëjë një hap të rëndësishëm drejt normalizimit të marrëdhënieve dhe njohjes reciproke mes Republikës së Kosovës dhe Republikës së Serbisë.
“Personalisht dhe në emër të Partisë Demokratike përshëndes marrëveshjen e arritur mes delegacioneve të Kosovës dhe Serbisë në Shtëpinë e Bardhë. Një falenderim të veçantë për Presidentin Trump dhe SHBA, për vëmendjen dhe përkushtimin ndaj Kosovës dhe Ballkanit. Shpreh shpresën dhe besimin se kjo marrëveshje do të përbëjë një hap të rëndësishëm drejt normalizimit të marrëdhënieve dhe njohjes reciproke mes Republikës së Kosovës dhe Republikës së Serbisë, duke i kontribuar kështu paqes, stabilitetit dhe integrimit Euro-Atlantik të rajonit,”-shkruan Basha./ Opinion.al
