Ndërsa PS dhe PD vazhdojnë me akuza e kundërakuza pas takimit të dështuar të së hënës Rama-Basha, LSI premton në SHBA se reforma do të votohet. Kryetari i kësaj partie, Ilir Meta po vazhdon axhendën e takimeve në SHBA.
Sipas zyrës së shtypit, Ilir Meta ka pasur një takim me ndihmës sekretarin amerikan të Shtetit, ambasadorin William Brownfield. “Meta i ka thënë diplomatit amerikan se Kuvendi i Shqipërisë do të kalojë këtë reformë sa më parë, për të rikthyer besimin e publikut te shteti ligjor, për të luftuar me efikasitet korrupsionin dhe krimin e organizuar, për t’i dhënë fund kulturës së pandëshkueshmërisë, për të përmirësuar klimën e biznesit dhe për të nisur sa më parë negociatat për anëtarësim në Bashkimin Evropian” thuhet në njoftimin e LSI për takimin.
Zyra e shtypit pranë LSI njofton gjithashtu se Ndihmës Sekretari Brownfield vlerësoi përpjekjet e Shqipërisë në rrugën e reformave dhe theksoi se SHBA mbështesin miratimin sa më parë të Reformës në Drejtësi, si një hap i rëndësishëm për rritjen e standardeve të sigurisë dhe shtetit ligjor të një vendi partner, anëtar në NATO dhe kandidat për në Bashkimin Evropian.
