Pas lajmeve në media dhe reagimit qytetar, qeveria u terhoq nga vendimi për të ndërtuar HEC-e në Osum. Mbrëmë në Opinion, ministri Klosi dhe sot në facebook kryeministri Edi Rama njoftuan se do të revokohet leja për ndërtimin e HEC-ve pasi është marrë përmes falsifikimit të koordinatave. Rama tha se qeveria ka gabuar, por në të njëjtën kohë reagoi duke mos e lejuar shkatërrimin e natyrës. Sakaq, të shumtë janë qytetarët që i shkruajnë në facebook se perse nuk ka anuluar edhe HEC-et në lumin e Valbonës në Tropojë. “Edhe ajo është një zonë e mbrojtur, një perlë e natyrës që po shkatërrohet nga HEC-et, që tashmë kanë nisur nga ndërtimi”, i shkruajnë qytetarët. Deri më tani Kryeministri Edi Rama nuk ka reaguar ndaj këtij shqetësimi.
