Deputeti i Lëvizjes Socialiste për Integrim, Ralf Gjoni ka folur sot për marrëdhëniet me Monika Kryemadhin. Ai u sulmua me bojë ditën që bëri betimin në Kuvend, pasi pranoi mandatin në Tiranë. Gjoni ka thënë për “A2CNN” se nuk ka asnjë kontakt me kryetaren e LSI-së, ndërsa shton se nuk ka asnjë informacion zyrtar se është përjashtuar nga partia.
“Nuk kam asnjë marrëdhënie me kryetaren aktuale të LSI. Kemi pasur marrëdhënie bashkëpunimi gjatë momenteve në parti. E di që ka thashetheme mediatike, letra se unë jam përjashtuar nga partia, por unë nuk di të jem përjashtuar nga kjo parti. Me linjën aktuale të lidershipit të LSI, unë nuk kam qenë dakord. Fillimi është dalja në opozitë me PD. Mua më duhet një veprim i nxituar dhe i panevojshëm. Unë mendoj se është një kulturë pozitive bashkëqeverisja”, është shprehur ai.
Në lidhje me sulmin me bojë, Gjoni tha se ka pasur edhe dy prita të tjera dhe se nuk do t’i falë ata që kanë ndërmarrë këto veprime.
“Të them të drejtën, policia ishte prezentë rreth apartamentit, por nuk ma merrte mendja se ata do të zinin pritë në dalje të apartamentit. Por jo vetëm kjo, por ka pasur edhe një ose dy prita të tjera në dalje të parkingut në vendet ku unë parkoj dhe ku doli nusja me vajzën. Kanë qenë disa njerëz, por nuk flas shumë për detajet pasi po hetohet. Është jo vetëm një prite ndaj një qytetari, por agresion ndaj një deputeti. Unë pragun e shtëpisë nuk e fal atë mendje që ka planifikuar një sulm në pragun e shtëpisë. Unë do të lë edhe pak kohë për policinë për të gjetur autorët. Unë shpresoj që policia t’i gjejë autorët”, tha Ralf Gjoni për “A2CNN”.
Ai tha se në LSI është krijuar një frymë intimiduese dhe se bojkoti apo dorëzimi i mandateve nuk ka qenë në filozofinë politike të kësaj partie./Opinion.al
