Presidenti Ilir Meta ka thënë se vendimin e tij për të anuluar datën e zgjedhjeve lokale e kishte marrë pasi ishte ndikuar nga informacione të besueshme se të shtunën e kaluar, protesta e opozitës mund të shfrytëzohej nga grupe të caktuar “për akte që rrezikonin një konflikt destabilizues me pasoja për jetën, dhe shëndetin e qytetarëve, sigurinë publike dhe rendin kushtetues në vend”.
Por deputeti Ralf Gjoni, i dalë nga lista e LSI shkon edhe më tej. Ai këtë të enjte në Kuvend tha se ka informacione se po përgatiten atentate ndaj politikanëve.
“Flitet që ditën e zgjedhjeve të ketë atentate. Janë ngritur celula me snajeperë për atentate kundër politikanëve. Duhet të mblidhet urgjentisht Këshilli i Sigurisë Kombëtare”, tha Gjoni.
Në fillim të fjalës së tij ai ju drejtua deputetëve të mazhorancës duke i pyetur se përse duan të shkarkojnë sot atë, që ata e zgjodhën vetë me whatsapp. Për Gjonin ata nuk mund ta shkarkojnë dot presidentin. Ndër të tjera ai tha edhe se dita kur Iliri Meta u emërua president është ditë e zezë për Shqipërinë por më vonë shtoi edhe që presidenti në Shqipëri nuk vlen asgjë.
“Sot po diskutojmë këtu për shkarkimin e Presidentit dhe ju nuk jeni këtu në Kuvend, o ju partia e whattsapp-it. Ku është Edi Rama. Hajde parlament hajde. Më vjen të qesh (qesh) me këtë teatër që po bëni këtu (qesh sërish). Doni të shkarkoni ju Ilir Metën si President. Ju e votuat atë në rresht me whatsapp, me urdhër. Por ju e votuat sepse donit që ta hiqnit nga politika, ta dergjnit aty në Presidencë që ngjan më shumë se një azil pleqsh. Po Ilir Meta është bishë politike more, nuk e hiqni dot jo”
“Dita kur Ilir Meta u vendos president, ditë e zezë! Largimi i Metës nga LSI-ja fund i kësaj partie. Nuk e kam besuar kurrë se zgjedhja e Metës është për të mirën e Shqiptarëve. Presidenti nuk vlen asgjë në këtë vend, jo Meta, por presidenti. Unë mendoj më mirë të ishim Monarki. Princi Leka dhe Princesha Zaharia janë më dinjitozë se Presidenti”, shtoi Ralf Gjoni në fjalën e tij. /Opinion.al
