Prej disa ditësh i gjithë globi ishte në ankth për shkak të daljes nga kontrolli të raketës kineze, e cila rrezikoi dhjetëra qytete.
Fatmirësisht, raketa kineze ra të dielën në mëngjes në Oqeanin Indian. Por, pas kësaj ngjarje, kanë shpërthyer polemikat mes Uashingtonit dhe Pekinit.
Ndërkohë, agjencia hapësinore amerikane fajëson sjelljen e papërgjegjshme të Kinës, duke e cilësuar në kundërshtim me rregullat e sigurisë. Zëdhënësi i NASA-s dhe ish-senatori Bill Nelson fajësoi Kinën për mungesë transparence.
“Kombet që bëjnë teste hapësinore duhet të minimizojnë rreziqet dhe të maksimizojnë transparencën. Është e qartë se Kina nuk mund të sigurojë informacion të besueshëm mbi rrënojat e raketës,” tha ai.
Nelson tha se ishte e nevojshme që Kina dhe të gjitha kombet që punojnë në hapësirë të veprojnë me përgjegjësi dhe transparencë në mënyrë që testet e ardhshme hapësinore të mund të kryhen në mënyrë të sigurt.
