Kryetare e Komitetit të Ekspertëve, Mira Rakacolli tha se Shqipëria do të vazhdojë të mbajë të mbyllura fluturimet me Britaninë e Madhe, në kuadër të masave të ndërmarra lidhur me pandeminë.
Nisur nga fakti që java e fundit ka shënuar një rritje të infektimeve, Rakacolli tha se ende nuk ka një vendim mbi kërkesën e Ministrisë së Arsimit për të kthyer në auditore studentët për kryerjen e provimeve.
“Po vlerësohet shfaqja e varianteve të transformuara të Sars-Cov2 që dihet që kanë një mundësi më të lartë infeksioziteti. Por fatmirësisht deri tani situata vazhdon të mbetet e kontrolluar dhe për këtë arsye në takimin e sotëm të Komitetit të Ekspertëve u vendos që të vazhdojmë ndërprerjen e fluturimeve me Britaninë e Madhe deri në një vlerësim tjetër, deri në një moment të dytë, ku do ta rivlerësojmë përsëri në varësi të dinamikës së situatës epidemiologjike”, tha Rakacolli.
