Përveç instalacionit “Reja” do të ketë edhe disa të tjera në Tiranë, tha kryebashkiaku Veliaj. Ai sot prezantoi një laborator tingujsh urbanë me emrin “Sonicity Tirana” i projektuar nga arkitekti dhe planifikuesi urban, Andrea Faoro.
Veliaj duke folur për instalacionin më të ri zanor tha se “ne jemi njerëz të zhurmshëm, çdo gjë e bëjmë me tam-tame të mëdha sepse zhurma është një pjesë që shoqëron psiqikën dhe kulturën tonë mesdhetare”.
Më pas ai ftoi qytetarët që të vizitojnë “Renë” dhe të dëgjojnë zhurmat e Tiranës, fëshfërimën, fishkëllimën, boritë, xhirimin e gomave apo lloj-lloj emocionesh që na jep zhurma në Tiranë.
Sakaq ai tha se së shpejti do të bëhet instalacioni i ri me emrin “Radura”.
“Do të jetë një tjetër koncept, por kësaj here jo më me metalin dhe me konfigurimin e “Resë”, por duke përdorur drurin dhe besoj se do krijojmë një pineskë tjetër në trupin e qytetit, që me shpresë do gjenerojë gjithashtu shumë evente”, tha Veliaj.
