“Jepni përgjigje qytetarëve në zyrat e Hipotekave ose në të kundërt hapni krahun”. Ministri i Drejtësisë, Ylli Manjani tha se “deri në fund të vitit, çdo kërkesë e depozituar në Zyrat e Regjistrimit të Pasurive të Paluajtshme duhet të shqyrtohet, përndryshe zyrtarët publikë do të përballen me masën disiplinore të largimit nga puna”.
Deklarata u bë gjatë një konference të përbashkët me zv.kryeministrin, ministren e Inovacionit dhe drejtuesit e ALUIZNI-it dhe ZRPP-së.
Një problematikë tjetër që duhet të marrë zgjidhje, sipas ministrit është edhe regjistrimi i lejeve të legalizimit te zyrat e regjistrimit të pasurive të paluajtshme. Ndërkohë, deri në fund të muajit do të bëhet funksional numri unik 118 që do t’u shërbejë qytetarëve për të marrë informacione në lidhje me pronën.
