Radha e gjatë e personave të cilët presin të marrin shërbimin shëndetësor në Repartin e Pediatrisë në QSUT ka bërë që ish-deputeti, Bardh Spahia të reagojë në Facebook duke pyetur drejtpërdrejtë ministren Manastirliu.
“Prindër me fëmijë me temperaturë që presin me orë të tëra për të marrë mjekim, deri në oborr. Mungesës së mjekëve për të përballuar fluksin e vizitave, i shtohet edhe mungesa e vendeve për të shtruar urgjencat. Prindërit pasi qëndrojnë në radhë me orë, blejnë mjekimin në farmaci dhe mjekët thjesht ua administrojnë sepse nuk ka vende, sado rëndë të jenë pacientët!”, shkruan Spahia duke e shoqëruar postimin e tij dhe me foto të radhëve jashtë dyerve të Repartit të Pediatrisë.
Ish-deputeti ngre pyetjen se përse shërbimet mjekësore nuk janë të parapërgatitura për fluksin e gripit.
“Parashikueshmëri zero! Si dreqin mund të mos jesh i përgatitur për një fluks gripi, të zakonshëm deri tani? Po sikur larg qoftë të përballemi me ndonjë situate a patologji tjetër me te rende? As një grip të thjeshtë tek pediatria nuk përballojmë dot???? Si mund të jetë paaftësia kaq epike? Zonja Manastirliu, e përsëris për të disatën herë, shëndeti i njerëzve nuk mund të trajtohet si PPP! Shkoni e shikoni situatën e prindërve të dëshpëruar tek urgjenca e pediatrisë! Nuk mjafton roja te dera për të penguar kamerat televizive! Bëhet fjalë për shëndet fëmijësh! Ke një situatë që duhet adresuar sa më parë!”, shkruan ai. /Opinion.al
