Presidenti Ilir Meta, ka reaguar lidhur me radhët kilometrike në Kakavijë. Kreu i shtetit i ka bërë thirrje qeverisë dhe Ministrisë së Jashtme, të vendosin kontaktet me palën greke, për të marrë të gjitha masat për lehtësimin dhe garantimin e lëvizjes së lirë të qytetarëve në anën tjetër të kufirit.
Meta theksoi se zgjidhja duhet të jetë e menjëhershme.
“Thellësisht i shqetësuar për situatën në të cilën ndodhen qytetarët shqiptarë të cilët vijojnë të jenë të bllokuar prej shumë orësh në pikën kufitare të Kakavijës, duke u ekspozuar seriozisht para rrezikut të përhapjes së pandemisë COVID-19.
I bëj thirrje urgjente Qeverisë dhe Ministrisë për Europën dhe Punët e Jashtme, të vendosin kontaktet me palën greke, për të marrë të gjitha masat për lehtësimin dhe garantimin e lëvizjes së lirë të qytetarëve në anën tjetër të kufirit.
Zgjidhja duhet të jetë e menjëhershme!”, shkroi ai.
Shkak për radhën e madhe është bërë testimi i detyrueshëm për këdo që kalon kufirin dhe mbyllja e sporteleve të palës greke nga ora 22:00 e mbrëmjes deri në orë 06:00 të mëngjesit.
Temperaturat e larta dhe radha kilometrike kanë bërë që shumë prej emigrantëve të kenë probleme shëndetësore apo shqetësime të tjera, por kjo nuk ka ndikuar që pala greke të shtojë stafin e mjekëve që marrin tamponët, apo të policëve doganorë.
Vendimi i qeverisë greke për të futur në karatinë të detyruar këdo që hyn në Greqi pas datës 17 gusht, ka bërë që të gjithë emigrantët e mbetur ende në Shqipëri të nxitojnë për tu kthyer./Opinion.al
