“Radarët e forcave detare, në shërbim të trafikantëve të drogës”

Zv/kryetari i LSI-së, Luan Rama, vijoi akuzat në lidhje me çështjen e radarëve të forcave detare, duke u shprehur se ato janë vënë në shërbim të trafikantëve të drogës. Sipas tij, nuk është rastësi që pikërisht prej vitit 2015 e deri më sot, periudhë kur Luan Rama thotë se Shqipëria u mbush me drogë, janë lënë jashtë shërbimit edhe radarët e Sistemit të Integruar të Hapësirës Detare. Numri dy i LSI-së pohon se ka me dhjetra relacione e akte kontrolli ku provohet se shqetësimi për mosfunksionimin e radarëve është prezent. Duke analizuar dokumentat që thotë se disponon, Luan Rama është i bindur se mosveprimi i strukturave përgjegjëse në Shtabin e Përgjithshëm të Forcave të Armatosura dhe në mënyrë të veçantë në Komandën e Forcave Detare, e ka vënë Sistemin e Integruar të Vëzhgimit të Hapësirës Detare në Shqipëri, në shërbim të trafikantëve të drogës! Nga dokumentacioni dhe relacionet, sipas Luan Ramës, rezulton edhe se një kompani private kontrollon me kamera aktivitetin e personelit ushtarak, gjë të cilën ai e cilëson si një skandal më vete.