Një tërmet i fuqishëm me magnitudë 7.7 ballë ka goditur Meksikën perëndimore, duke vrarë të paktën një person dhe duke shkaktuar panik në kryeqytetin e vendit, pikërisht në datën kur ishin regjistruar dy tërmete të mëparshme.
Sipas Shërbimit Gjeologjik të SHBA, tërmeti goditi pak pas orës 13:00 me orën lokale të hënën dhe epiqendra e tij ishte në zonën kufitare midis shteteve të Michoacan dhe Colima. Magnituda e tërmetit u raportua fillimisht nga Shërbimi Gjeologjik i SHBA-së si 7.6 ballë, ndërsa më vonë Agjencia kombëtare sizmologjike e Meksikës e përditësoi magnitudën në 7.7 ballë.
Qeveria meksikane tha se një person u vra në portin Manzanillo të Paqësorit kur një çati e një dyqani u shemb, ndërsa zyrtarët rajonalë raportuan dëme në disa spitale në Michoacan, duke shtuar se një person u plagos nga rënia e xhamit në një prej spitaleve.
Sakaq, kryebashkiaku i qytetit të Meksikës, Claudia Sheinbaum tha se nuk kishte raporte të menjëhershme për dëme në kryeqytet pas tërmetit, i cili goditi Meksikën në të njëjtën ditë kur tërmetet e mëdha goditën vendin në 1985 dhe 2017.
Nga tërmeti i 19 shtatorit 2017 humbën jetën më shumë se 350 njerëz, ndërsa tjetri në të njëjtën datë në 1985 vrau mijëra njerëz.
Sakaq, nga pamjet që vijnë pas tërmetit shfaqen njerëz të frikësuar, duke qarë ndërsa rrugët e qytetit janë një kaos i vërtetë.
