Një dhi tre-vjeçare e quajtur Lincoln është zgjedhur si kryetare e bashkisë së qytezës Fair Haven në Vermont, SHBA. Tashmë dhia Lincoln do të bëjë dalje publike në Fair Haven për një vit duke pasur vëmendjen maksimale të banorëve.
E gjitha kjo është një thumbim që vjen për politikën amerikane, e cila si rrallë herë më parë është bërë shumë e ashpër dhe e polarizuar.
Në “zgjedhjet” në Fair Haven dhia Lincoln fitoi mes 15 kandidatëve të tjerë, ku kishte shumë qen dhe mace. Lincolni mundi të mbledhë 3 vota më shumë se qeni me emrin Sammie, që u rendit në vendin e dytë.
Qyteza Fair Haven nuk ka kryetar bashkie, por ka një menaxher qyteti që praktikisht mbulon të njëjtat funksione. Ishte pikërisht menaxheri i qytetit, Joseph Gunter, i cili vendosi të organizonte këto zgjedhje dhe të ardhurat që u gjeneruan, do t’i përdorë për ndërtimin e një këndi lojërash.
Pronari i dhisë është një mësues matematike, ndërsa menaxheri i qytetit Joseph Gunter deklaroi se vitin tjetër do të ketë një pjesëmarrje më të madhe, duke e parë këtë proces si një mënyrë argëtuese për t’i edukuar fëmijët e shkollave fillore me procesin e zgjedhjeve lokale./Opinion.al
