Berati është qyteti i vetëm në Shqipëri, gjatë vitit 2017, që nuk ka shënuar asnjë vrasje apo vepër të rëndë penale.
Lajmi është konfirmuar nga drejtori i Policisë së Shtetit, Ardi Veliu gjatë prezantimit të raportit vjetor të punës së uniformave blu në qytetin e Beratit.
Në fjalën e tij, Veliu tha se fokusi i policisë për vitin 2018-të do të jetë operacioni kundër krimit të organizuar: ‘Forca e Ligjit’.
“Drejtoria Vendore e Policisë Berat ka patur rezultate pozitive. Vlen për të theksuar që gjatë vitit 2017 në këtë territor nuk është evidentuar asnjë vepër e rëndë penale, pra shifra e ngjarjeve të rënda kriminale është zero. Ashtu si dhe dua të theksoj se numri i aksidenteve me pasoja të rënda, pra me pasoja fatale është jashtëzakonisht i ulët në krahasim me Drejtoritë e tjera Vendore të Policisë”,-u shpreh ai.
Më tej, drejtori i Policisë së Shtetit, u pyet nga gazetarët nëse do ketë reforma në polici, por ai theksoi se një gjë e tillë nuk do të ndodhë. Duke shtuar, se në polici do të ketë ristrukturim ose riformatim për t’a bërë strukturën sa më efiçente dhe më fleksibël.
