Sekretari i Përgjithshëm i Partisë Demokratike Gazment Bardhi dhe Kryetarja e Gruas në këtë forcë politike Albana Vokshi kanë qenë sot në periferi të kryeqytetit, në vizita në disa familje në nevojë.
Në njërën prej tyre, kryefamiljarja ka treguar se jetonte në një çadër të improvizuar si strehë dhe po aty kishte ndërruar jetë edhe bashkëshorti i saj. Ajo pohoi se nuk merrte mbështeje sociale.
“I shihni vetë në ça kushtesh po jetoj me dy fëmijë jetimë. Edhe burri këtu ndrroi jetë. Tani që ndërroi jetë burri ato më thanë që na kanë kthyer përgjigje në kompjuter që nuk ka pikë të mjaftueshme, nuk e meriton. Ça pikë doni ju kur unë jam pa shtëpi në një kasolle plastmasi”, ka treguar gruaja.
Sekretari i Përgjithshëm i PD, Bardhi tha se vaksina më e mirë , është të shpëtojmë vendin nga shkaktari i këtij dështimi.
“Kjo është kur humbin realitetin. S’e kuptojnë në ç’hall jetoni ju dhe në ç’kushte jetoni ju. Para 8 vitesh na premtoi rritje të ndihmës ekonomike dhe tani ka nxjerrë familje nga ndihma ekonomike. Vaksina më e mirë është të shpëtojmë vendin nga ai që na ka sjellë këtë dështim”, tha ndër të tjera Bardhi ndërsa pohoi se ky do të jetë viti i ndryshimit./Opinion.al
